الجاثوم وحكايات من الواقع


كتبت : مي خضير 

قررت اكتب بالعامية علشان ميبقاش ملل
هتكلم عن حاجه كانت بتجيلي كتير اوي و هي الجاثوم
الاول اوصف احساسي اما بيجيلي..
بحس اني مشلوله و مش عارفه اتحرك و جسمي كله منمل بس فايقه و صاحيه و عارفه ايه الي بيدور حواليا كله و اقدر ابص و افتح عيني و اقوم م ع السرير بس بروحي بس و جسمي علي السرير لسه،

الحاله دي بتحصلي كتير جدا و مش عارفه بتيجي ليه هل فعلا دا بيبقي جن متسلط؟ّ
بس انا مش بؤمن بالتخلف دا جن و عفاريت لا لا ،
طيب استنوا خليني احكي شويه مواقف حصلتلي وانا ف حاله الجاثوم دي،
انا مش فاكره اول مره حصلتلي كانت امتي بس ال اعرفه اني كنت بعاني منها بداية من فترة الاعدادي لحد دلوقتي انا دلوقتي عندي 24 سنه صحيح دلوقتي خفت كتير بس ساعات بتيجي،

فاكره كويس جدا كنت ببقي نايمة ع السرير و اقوم مره واحده مش عارفه اتحرك ولا اتكلم و يا اقرر افضل مغمضه عيني فأحس بالاحساس دا بس وافضل احاول احاول لحد ما اقوم ، او القرار التاني بقي افتح عيني و اشوف مناظر مرعبه ، كنت بخاف افتح عيني ف الاول بس قولت لا افتح بعد كدا و اشوف ايه الي حواليا دا ،
فاكره جدا شوية مواقف م الاعدادي وانا مفتحة الاقي الرسومات الي موجوده ع الحيطة الي انا رسماها بايدي و مفتخره اوي برسمي بلاقيها بتتحرك ، و افتكر بنت شابه دخلت عليا الاوضه و حطت علي دماغي مخده و حولت تكتم في نفسي فضلت احاول احاول لحد ما طلعت نفسي من الحاله دي،

و افتكر و ادان الفجر بيدن و انا مستغربه ازاي الفجر بيدن و بيجيلي الحاجات دي و ابقي نايمه ع جنبي اليمين و الاقي حد ماسكني م كتفي عشان انام ع جنبي الشمال،
و كمان افتكر لما السرير اتهز بيا مره واحده و البطانيه فضلت تطلع و تطلع ع وشي و كنت قولت خلاص دي بتخنقني وهموت .. دا الي فكراه في فترة الاعدادي،
الي افتكره بقي في الفترات الي بعد كدا ثانوي و كلية ولحد دلوقتي هي ان الحاجات دي تقريبا كدا اتطورت اكتر .. اتطورت لدرجه انها بتفضل سايبه اثر فيا بعد ما بخرج من حالة الجاثوم فترة اعدادي كنت بتاثر بس خلاص مبتسبش اثر بعد ما بقوم منها ،

الفترة الحالية دي في ايام الكلية مثلا شوفت حد بيقع من البلكونه فضلت اصوت اصوت اصوت فوقت من الجاثوم لاقيت ان صوتي مبحوح كأني كنت بصوت بجد ومش قادرة اتكلم من كتر الصويت و الصريخ و فضل صوتي كدا يومين كاملين .

مره تانيه جالي الحاله دي وقررت اني اقرا قران كل ما اقرا قران المسكه ال ف جسمي تزيد اكتر لحد ما حد خربشني في راسي و وقومت لاقيت دماغي متعورة و بتطلع دم .

مره تالته بقي و دي كانت حاجه في غاية الغرابة .. قومت و طلعت فوق السطح عندنا لاقيت فيه حفره بيطلع منها كتاكيت كتير اوي فضلوا يطلعوا لحد ما عملوا فرخه انا جبت سكينة وقتلت الفرخة دي دبحتها و بصيت من ع السور ومنظر شارعنا كان هو هو قولت يا ولاد الكلب عندكو عالم زي بتاعنا بالظبط ولاقيت حد بيهمس ف ودني وانا مش شيفاه بيقولي انتي فيكي الخير انتي قتلتيها دي كانت معذبنا ربنا يكرمك فيكي الخير ، بس انتي لازم تقومي حالا و تشغلي الرقية الشرعية انا فوقت و مكنتش اعرف ايه الرقيه الشرعيه دي سالت ماما ساعتها قالتلي دي حاجه للناس الي بتبقي ممسوسه استغربت اوي، 

صحيت اليوم الي بعدها و الموقف دا ف دماغي اوي ودخلت الاوضه الي كان فيها الموقف لاقيت فيها راس كتكوت بجد راس كتكوت علي السور .. واحنا اعلي بيت و عمارتنا السطح بتاعها دا في الدور السابع استغربت جدا و نديت والدي قولتلو لاقيت راس كتكوت استغرب قالي ازاي تيجي هنا المهم انها راس بس و الكتكوت عينه مفتوحه و شكله مش متبهدل ومعلوش نقطة دم .

مره كمان دي كنت حاسه اني هموت فيها لاقيت ناس كتير حوالين السرير لابسين زي عبايات سودا وواقفين يقولو قران غلط بجد قران بطريقة غلط وانا اقولهم لا غلط و يشتموا في ربنا و انا اقولهم غلط بطلوا غلط و يقربو عليا حسيت قلبي بينبض جامد اوي فضل ينبض ينبض حسيت ان قلبي هيقف و هموت صحيت مكنتش قادره اخد نفسي كنت بطلع في الروح و بموت ،

وآخر مره خالص بقي لسه من شهر كدا ..
جالي نفس الحاله بعد فترة قطيعه كبيرة اوي فضلت احاول اقول قران ساعتها نسيته معرفتش اقول خرجت فيه في الصاله عندنا صورة مكتوب عليها ايه الكرسي فوق التلفزيون لاقيت الصورة دي متشاله و تحتها فراغ استغربت جدا ايه قرانيه تختفي ازاي ،ومره واحده لاقيت حد بيضربني في سناني قومت لاقيت سناني بتوجعني جدا .
مش عارفه الصراحه اقول ايه علي كل الي بيحصلي دا او افسره تفسير عقلاني و منطقي .

ليست هناك تعليقات

اكتب تعليقك هنا