رواية الجحيم - العائد من الجحيم الجزء الاول

شفرة ديفينشي

هذه القصة من وحي خيال الكاتب وليست حقيقية - حقوق الطبع والنشر محفوظة لموقع قصتي 

العائد من الجحيم الجزء الاول


السلام عليكم .....

انا اسمي رافو شاب زي اي شاب في العالم واهتماماتي مقاربة لأهتمامات معظم الشباب اللي في سني . 

طول عمرنا بنسمع ان البشر مش لوحدهم اللي عايشيين في الدنيا او علي وجه الارض ولذالك علمونا في المدارس كيفية احترام حقوق الغير وبناءا علي كده اقيمت الكثير من المنظمات التي تدعو للحفاظ علي حقوق الاخرين طبعا علي رأسها منظمة حقوق الانسان ومنظمة حقوق الحيوان وكمان اهتموا بالنبات وقامت منظمة ازرع شجرة والمحميات الطبيعية وغيره وغيره بس مش ده اللي انا جاي اتكلم فيه اللي انت متعرفوش واللي انا لسه عارفة ان في منظمة لحقوق الشياطين !!!

حقوق الشياطين .... وهي الشياطين ليها حقوق اصلا علشان تأخدو مننا !

وده اللي انا جاي احكيلكوا عليه النهارده من غير ما اطول عليكوا خليني احكيلك قصتي

انا بدرس في كلية أثار وفي سنة رابعة حاليا اتعلمنا كتير اوي عن الحفريات وعلشان ان كنت مهتم بالموضوع ده اوي كنت بحبه وكنت شاطر فيه جدا والحمد لله لقيت التقدير علي مجهودي دكتور اربان هو الدكتور اللي كان بيدرسلي المادة دي وانا زي ماقولتلكوا كنت شاطر في المادة دي جدا ودكتور اربان كان بيعزني جدا وكان بيعاملني زي سكرتيره الخاص واخدني معاه في اكتر من مشروع خاص بشغله الخارجي بره الجامعة وكان واعدني اني اشتغل معاه بعد ما اخلص كليتي .

وفي يوم الدكتور اربان كلمني وقالي يا رافو جهز نفسك علشان بكره هنروح مشوار مهم جدا .. وكالعادة انا كنت مبسوط جدا ان احنا هنروح نكتشف حاجة جديدة .

وبالفعل نمت بدري علشان اصحي بدري اروح المشوار مع الدكتور بس الغريب ان حصل اللي عمره ما حصلي قبل كده .. جالي كابوس .. وكابوس مكنتش فاهم معناه وليه في الوقت ده بالزات انا اللي اعرفه ان الكوابيس دي بتبقي ناتجه عن توتر او اكتئاب او خوف من حاجه معينة وانا متحققش عندي اي شرط من الشروط دي .. الكابوس كان مخيف جدا بالنسبة ليا راجل لونه احمر وطويل وعريض بيبصلي بأبتسامة غريبة جدا علي وشه وجنبه رؤؤس ناس مذبوحين من فترة قريبة لأن الرؤؤس مكنتش متحللة ولكن كانت علي وشك انها تتحلل وماسك في ايده عصاية شكلها غريب متشعب منها عظام ولونها احمر شبه العمود الفقري للأنسان وبيردد كلمة واحدة بس
ارجع ..... ارجع ..... ارجع 
قمت مفزوع من نومي ومنمتش لحد ما جهزت نفسي والتليفون رن كان دكتور اربان بيأكد عليا اني اجي ونزلت روحت للدكتور اربان
انا : صباح الخير يا دكتور
الدكتور : صباح الخير يا رافو مستعد للجاولة دي يا بطل 
انا : اكيد يا دكتور هبهرك ان شاء الله 
الدكتور : شكلك منمتش كويس مال عينك متضخمة كده ليه
انا :فعلا يا دكتور منمتش كويس بس عادي لا تقلق انا زي الفل 
الدكتور : يبتسم ويقول ده اللي متوقع منك يا بطل انت تلميذ نجيب ومثال جيد لكل الطلبة اللي في سنك .. المهم بقه بص يا سيدي المشروع اللي احنا رايحينه النهارده ده مهم جدا وهيخلينا في مكانة تانية خالص غير اللي احنا فيها فعاوز تركيزك يبقه حديد لأن علماء كتير جدا اعتذرو عن الموضوع ده واحنا اللي هنقوم بيه 
انا : في حماس شديد .. متقلقش يا دكتور دانا تلميذك 
وبالفعل ركبنا السيارة وبدأنا نتحرك في طريقنا للمكان اللي احنا رايحينه واللي انا معرفشي لحد دلوقتي هو ايه المكان ده .. هو انا مسألتش ليه احنا رايحين فين مع ان كل مره بسأل الدكتور وبستفسر منه قبل ما نطلع مش علشان خايف لا علشان ابقه علي معرفة بالمكان ده واعرف ايه اللي فيه .. 
انا : بعد اذن حضرتك يا دكتور .. هو احنا رايحين فين 
الدكتور : بصلي بأبتسامة خفيفة وقالي خليها مفجأه يا رافو لما توصل احسن
اتحمست اكتر واكتر ده شكله موضوع كبير فعلا وفيه مغامرة وانا بحب النوعية دي في شغلي .. منمتش كويس وعيني بدأت تقفل نمت 
بعد سفر استمر 7 ساعات 
الدكتور : اصحي يا رافو يلا احنا وصلنا 
فتحت عنيا وببص حواليا ما لقتش الا رمل في كل مكان علي ابعد مسافة لعيني مش شايف بيوت كله رمل استغربت من المكان وبصيت للدكتور بأستعجاب 
الدكتور : ضحك وقالي ايه يا رافو مالك مش جايبك اقتلك وادفنك هنا يعني .. يلا يلا ننزل علشان نجهز الحاجة 
نزلنا من العربية ونزلنا المعدات من الشنطة والدكتور قال للسواق يلا يا نظير روح انت لأقرب مدينة وهاتنا الاكل ومتنساش اللي قلتلك عليه 
محاولتش ادخل واعرف ايه اللي قله عليه ... المهم الجو فراغ كبير والدنيا بدأت تبرد وانا مكنتش عامل حسابي ان احنا هنبقه في مكان زي ده 
الدكتور لاحظ اني بردان قالي بقولك ايه تعالا نولع حبة حطب كده علشان شكلك بردان يا خرع ...
الغريبة ان احنا هنجيب الحطب منين احنا في صحراء ومش شايف اي حطب حوالينا و كمان المعدات انا منزلها بأيدي كلها ومفيش فيهم حطب خالص فده خلاني اسأل الدكتور بسخرية وهنجيب الحطب ده منين ان شاء الله ..
الدكتور : ايه يا رافو انا عمري خذالتك قبل كده مع اني كنت عاوز اخليها مفجأه بس مضطر بقه علشان انت بردان يا خرع ...
انا : لا طبعا يا دكتور حضرتك عمرك ما خذلتني قبل كده بس احنا في صحرا وانا مش شايف اي حطب قدامي وكمان انا اللي منزل الحاجه كلها من العربية ومصدفتش اي حطب خالص وانا بنزلهم
الدكتور : طيب روح هات الكتاب البني اللي موجود في شنطة المعدات 
فتحت شنطة المعدات ودورت علي الكتاب ولقيته ... كتاب شكله قديم جدا مكتوب عليه حروف مش بالعربيه ولا الانجليزية ده .. ده هيروغليفي ... بس دي فرصتي بقه علشان اطبق اللي درسته في الهيروغليفية 
وبالهدوء كده بدأت اجمع الحروف 
ح.....ق....و....ق--- ا...ل...ش...ي...ط...ا....ن
حقوق الشيطان !!!

لو عجبك الجزء الأول من القصة متنساش تسيب تعليقك و انتظر باقي الاجزاء
واشترك بالأيميل في الموقع علشان يوصلك باقي الاجزاء بمجرد ما تنزل

الجزء الثاني .....
هنا

الجزء الثالث ..... من هنا
الجزء الرابع .... من هنا
الجزء الخامس ... قريبا

ليست هناك تعليقات

اكتب تعليقك هنا